政情：工專聯見鬍鬚曾表面團結
工商專業聯盟尋日拉隊見財政司司長鬍鬚曾，就來年財政預算案畀意見。聯盟召集人林健鋒（Jeffrey）早幾日已經搶閘預告會同鬍鬚曾傾啲乜，搞到自由黨主席劉健儀唔多高興，要喺前日特登搞個傳媒聚會重申該黨嘅立場，費事畀人搶晒風頭。不過，尋日十二個聯盟成員都有八個去見鬍鬚曾，表面上唔似外界所講咁唔團結，但會後就各有各講。
工專聯要求政府將居所貸款利息提供倍半至二倍嘅扣稅額，方便有意上車人士。民生方面，佢哋要求政府今年加碼派二千元醫療券，以及退還百分之七十五嘅薪俸稅，以二萬元為上限。Jeffrey仲喺會上要求政府審慎理財，應使則使。
專業會議梁美芬就話，因應花園街大火，佢要求鬍鬚曾成立意外事故支援基金，幫助受大火影響嘅居民同商戶，又建議政府新增醫療事故基金協助傷者。總之大家各有各講，原來團結只係假象，實則都係各自發揮。
劉健儀會後以趕時間為由冇同記者講嘢，但其實佢早已將自由黨嘅建議電郵咗畀傳媒，仲送多句「多謝工商專業聯盟支持了不少自由黨提出的建議」，暗寸聯盟其他成員炒佢哋橋。