政情：林D9遺害玩殘建制派
區議會選舉種票風波愈鬧愈大，負責制訂現行選民登記政策嘅前政制及內地事務局局長林瑞麟（林D9）遭到泛民主派猛烈批評。原來建制派亦受到林D9留低嘅蘇州屎遺害，但唔係講緊區選，而係將於本月十一日投票嘅特首選舉委員會。建制派質疑林D9當年制訂政改方案時漏招，令選委會內嘅區議會、鄉議局及政協委員界別嘅投票方法極為複雜，隨時有大量廢票，甚至擔心會出現意外賽果。
林D9有份炮製嘅二○一二年政改方案，訂明下屆立法會將由六十席增至七十席，而該七十名立會議員，將自動成為特首選委會委員。不過，當局到政改方案通過後，開始制訂相關本地立法才醒覺到，下屆立法會喺明年九月先至正式產生，但選委會喺今個月就要組成，現時立法會只有六十名議員，變相令十個當然選委議席注定懸空。
為免選委會變得名不副實，林D9決定將該十個選委議席，暫時分配畀同屬第四界別嘅其他分組，其中港九各區議會、新界各區議會及鄉議局界別各分兩席，政協界別就分到四席，等到下屆立法會產生後再讓番呢十席畀啲立會議員。不過，呢個安排立即又產生另一問題，就係由邊幾位區議員、鄉議局代表同政協讓位呢？
林D9最後諗咗一個極為擾民嘅做法，就係喺呢四個界別實行差額投票，例如政協界別現時有五十五席，但實際投票時選民只須剔選五十一名候選人，最後以最低票數當選嗰四名政協，喺明年九月就要讓番個位出嚟。同樣道理，現時分別有廿八席、五十九席、六十二席嘅鄉議局、港九區會同新界區會界別，選民亦只須剔廿六、五十七同六十個名，每個界別最低票當選嗰兩名選委將來就要讓位。
易剔錯名變廢票
呢個做法好似好公平，但實際上就玩殘啲選民同候選人。須知呢四個界別都係建制派嘅囊中物，例如有五十九席嘅港九區議會，建制派早就協調出五十九個人選，但依家又要教曉班支持者到時要剔少兩個名，一剔多咗就會變成廢票，隨時益咗泛民嘅候選人，真係好傷腦筋。
最慘係根本冇泛民挑戰嘅政協界別，建制派幾經辛苦先至啱啱好協調到五十五名政協參選，本應安安樂樂全部自動當選，依家不但要進行投票，仲要教曉班政協選民只可剔五十一人，最後即使冇投錯票，都會傷和氣甚至得罪人，令得票最低嗰四位政協冇晒面，林D9真係累街坊。