中環出更：四太冧莊400萬投白松露
又到深秋，又係白松露飄香嘅時候。澳博尋晚舉行意大利白松露慈善拍賣晚宴，講得清楚啲，係透過衞星全球競投。喺拍賣前，賭王四太梁安琪捧住最大嘅一顆白松露，愛不釋手。結果佢以四百萬澳門幣，投得共重一千四百九十五克嘅白松露。
一共有六組意大利白松露供嘉賓競投，當中最大嘅白松露重九百八十克，來自意大利托斯卡尼，與另一顆重五百一十五克來自意大利阿爾巴嘅白松露合成一組。白松露當前，四太特別興奮，佢去年以志在必得嘅姿態，以卅三萬美元（約二百五十七萬港元）擊敗來自另外兩個城市以網上競投嘅競爭者，成功投得兩顆分別重九百克及四百克嘅白松露。尋晚去新葡京湊熱鬧嘅，有港澳名人、多國領事，以及接受捐款嘅慈善機構代表。
慈善拍賣會所得善款將捐贈澳門九間慈善機構。四太話，白松露嘅味道太濃烈，佢只會畀少少賭王試吓。