中環出更：富二代雲集撐百仁就職
匯聚城中富二代嘅「百仁基金」，尋晚喺中環四季酒店舉行第三屆董事會就職禮，喺自己地頭搞騷，身為榮譽兼創會主席嘅李家傑分外風騷。有三胞胎滋潤，家傑睇落後生晒，無他，三子似足佢咁醒，近日仲學識叫爸爸添，開心過中頭獎。特首選舉已入閘，大孖沙支持與否成關鍵，到底家傑撐邊個，佢就淡定話：「梗係由爸爸決定啦，佢係一家之主嘛！」
李家傑投施子清墨寶
百仁辦喜事，副主席李文俊、楊華勇、廖偉麟、林智彬、霍啟剛都嚟撐場。主席施榮忻（Jaime）帶頭獻出第一次，捐出由佢主辦嘅廚藝課程作慈善競投，獲副主席陳寧濘、林潞及鄭建山等人合資十二萬港元投得。Jaime爸爸施子清都為善不甘後人，捐出珍貴墨寶拍賣，世伯咁有心，李家傑二話不說以八萬元投得。
家傑之所以咁畀面，原來佢係施子清嘅入室弟子，已拜師學書法幾年喇。家傑謙稱手字仲係「肉酸」、「唔見得人」，立心練好支筆，幾年間不停抄寫心經及金剛經，更將作品送畀爸爸李兆基賀壽。至於幾時可以開書法展？佢就話有排，事關功力未夠深厚，寫字時難免心浮氣躁，未入化境喎。
伍穎梅重男友輕特首
同場嘅「九巴金公主」伍穎梅（Winnie）妙論特首選情，佢直言依家對佢最重要嘅男人，係富豪男友許晉平，唔係特首喎。講到咁sweet，唔通好事近？Winnie甜笑三聲，盡在不言中。至於啟剛對特首選情保持中立，雖然佢媽媽朱玲玲力挺梁振英，但佢認為候選人各有所長，未知揀邊個好喎。
卓妮