日本三一一地震引發海嘯摧毀福島核電站至今，核危機到底解除咗未？計功夫茶話齋，只怕不小心，不怕太小心，大家都係謹慎為妙，謝絕日本食物以及東瀛貨品始終係萬全之策。至於去日本旅行咯喎，大家真係要三思，事關連距離福島災區比較遠嘅北海道都有輻射。
嗱嗱嗱嗱，咪話靠嚇，留守福島核電站指揮救災嘅站長近日緊急入院，唔排除同輻射中招有關。核電站反應堆更加發現有核裂變先至會出現嘅放射性氙，令到核危機有升級之虞。
今年十月中，有民間組織驗測過東京，發現有廿二處泥土每平方米含超過三萬七千貝可銫-137，最高更達前蘇聯切爾諾貝爾核災之中必須強制遷離嘅等級。福島第一核電站一號廠房今年六月冒出蒸氣，空氣輻射量每小時四千毫希，簡直無孔不入。
正所謂病從口入，日本食物有幾高風險呢？當地不斷有食物驗出含有銫-134以及銫-137，例如魚類、貝類、綠茶、草藥、大米、牛肉、茶葉、蔬菜、木耳同蘑菇等等，部分含量超出安全標準。正如全民健康動力主席勞永樂話齋：「食咗受輻射污染嘅食物，唔會即刻出問題，但放射性物質例如銫可停留人體內，長期累積十年、二十年，會令患癌風險增加，所以最好就係唔好食。」
有人可能會問，日本政府不斷抽樣檢查各式食物，拍晒心口話冇事，咁仲有乜好擔心呢？講到呢家嘢，功夫茶提提你，報喜不報憂絕對唔係中國人嘅獨門秘技。
其實日本人自己都好擔心，十一月初福島縣南相馬市醫療機構發表為七歲以下兒童進行尿液檢驗嘅結果，發現一千五百多人之中約有百分之七含放射性銫。另外，今年六月厚生勞動省從福島縣四個城市，檢測二十一名女性母乳樣本，其中七個樣本發現微量放射性銫。
根據《美國國家科學院院刊》推算，北海道嘅銫-137含量由零至二百五十貝可，東京嘅數值介乎一百至二百五十貝可。你話嘞，去日本旅行係咪要好似領養寵物咁停一停、諗一諗？
香港理工大學固體電子學講座教授胡仲豪係咁講嘅，輻射影響並非即時可見，而且大家都唔知幾多受污染食物已經流出市面，唔好低估問題嘅嚴重性。呢位學者更加補充一句，以為幾個月之後就已經安全係好天真。
所以話啫，小心小心再小心，日本核輻射危機未除，港人同胞切莫掉以輕心。你知啦，香港政府嘅把關能力一向有口皆悲，你靠食物安全中心篩選安全食物？三個字，好天真！