政情:立會表決爆人為錯誤

立法會新大樓運作咗個幾月,一直未有大問題發生,點知尋日發生一次嚴重甩轆,話說議員就《2011年證券及期貨(專業投資者)(修訂)規則》修訂表決時,表決鐘響足五分鐘後都投唔到票,搞到要暫停會議修理。後來立法會秘書長吳文華澄清,系統完全冇問題,只不過係新上場嘅秘書心急得滯,手快快撳多咗一次計時器,令電腦要重新啟動喎。

當系統重新運作後,議員可以投票,點知顯示結果時,發現本應要投反對票嘅民建聯陳克勤,竟然逆黨意投下棄權票,佢嘅黨友劉江華於是為克勤仔解畫,聲稱純粹係顯示錯咗喎!呢件甩轆事件得出結論係,系統甩漏或人為錯誤已令人失去信心,如果日後有議員唔小心撳錯掣、投錯票,賴落個系統度就弊喇。

講開又講,立法會嘅紀念品售賣店尋日開張,出售各式各樣印有立法會會徽嘅紀念品,當中唔少都幾實用,好似價值七十元,內膽可以放入微波爐用嘅保溫杯、三百五十元就有交易嘅Cashmere純羊毛頸巾及大量文儀用品。

「Money18免費即秒股票報價網站」現推出8升級功能,財經資訊,實時實發!