政情：惡實Q累何鍾泰見紅
添馬艦立法會新大樓入伙後，中環立法會舊大樓由政府外判保安正式接管，不過大樓依舊人面全非，外判保安嘅表現同立法會保安態度好唔同，最緊要係佢哋唔認得啲議員，立法會工程界議員何鍾泰（Raymond）就係因為返去舊大樓泊車時同保安發生爭執，整傷咗隻手指，搞到要到醫院包紮同食抗生素。
立法會舊大樓預咗五個車位畀議員泊車，自從舊大樓本月初交番畀司法機構後，政府聘請一批外判保安接手保安工作，據聞當中有幾個保安特別聲大夾惡，激到班議員紮紮跳。
話說Raymond星期一返舊大樓諗住泊車遭拒，同外判保安理論期間，關車門時唔為意夾親自己手指，血流如注，起初Raymond以為冇乜事用濕紙巾包住佢就算，第二日睇醫生先發現有一塊肉削走咗，搞到依家要食抗生素，又預計至少要兩至三個星期先會好。可能因為呢單慘劇，司法機構尋日通知議員，今日起去舊大樓泊車，要先領取泊車證。