「唔該，兩千蚊齊頭」，「唔係啩？呢部洗衣機明明標價千八蚊，點解無喇喇收多兩舊水嘅？」「唔好意思，我哋代政府收垃圾費嘅咋」。賣電器送贈券就聽得多，收埋垃圾費簡直聞所未聞。不過，市民好快就有機會親身體驗吓喇。
環境局局長邱騰華又有新搞作，買電器要收垃圾費。當局計劃將「廢電器生產嘅責任計劃」提交立法會討論，日後市民凡購買電視機、洗衣機、雪櫃同電腦等，付款時仲要即磅一百至二百五十蚊不等嘅棄置電器處理費，銀碼視乎產品大細同處理成本，而零售商就要提供強制回收服務。
環保署話，現時本港每年產生約七萬公噸廢電器同電子產品，大部分都出口去發展中國家。當局打算喺屯門環保園興建廢電器電子產品處理廠，每年可處理三萬公噸廢電器，達到七成半循環再造目標喎。不過咁，以邱局長嘅「往績」，做唔做到，畫公仔唔使畫出腸啦。
查實又係吹水唔抹嘴，咁多年嚟，邱騰華啲「新招」十隻手指數唔晒，有幾多成事吖？循環再造、變廢為寶造福下一代，市民一定支持，弊在當局閉門造車，不切實際，為回收而回收，又冇切實可行嘅配套措施，最終盞整多一個爛尾政績工程。
講真，強制零售商提供回收服務，代收廢物處理費，當局分明就係推卸責任。實力雄厚嘅大型連鎖店就話有足夠資源應付呢啲額外要求啫，嗰啲專做街坊生意，僅靠微薄利潤生存嘅舖頭仔，邊有咁多人力物力幫港府「捱義氣」呀？
再講吖，家陣生意難做，港府對大業主瘋狂加租關人個關，小型電器舖隨時可能捱唔住要執笠。街坊客買電器交咗「垃圾費」，下次想換新款，舊嗰部分分鐘冇人收，親自送去回收點，會唔會畀當局掠多一筆都仲係未知之數，你話係咪搵笨吖！
呢，有市民就睇死呢個計劃一定失敗收場，因為選擇將舊電器賣畀收買佬，有錢落袋之餘，同樣可以達到回收嘅效果。邱騰華嘅回應就好搞笑，佢話強制回收安排只係「補底方案」，市民仍然可以選擇將舊電器賣畀收買佬。
簡直九唔搭八，既然係咁，又何必阿茂整餅，冇嗰樣整嗰樣，仲要拉埋零售商落水吖？
話時話吖，港府搞環保從來都係冇承擔，冇投入，口爽荷包立，一味諗縮數，樣樣要人哋埋單。呢，改善空氣質素，淨係識等內地減少排污，自己坐享其成；回收舊電器又係咁，自己翹埋雙手，推畀消費者。唔怪得有人話，邱騰華啲「宏圖大計」，信佢半成，雙目失明咯。計功夫茶話齋，回收舊電器勢在必行，不過最緊要順手回收埋啲廢柴官。