政情：方剛撐華仁 豪捐五萬
由港、九華仁書院師生、校友及家長成立嘅「華仁一家基金會」，今年再次組織一支跑手團隊，準備參加明年二月嘅馬拉松比賽，並希望透過活動籌到一百萬元捐款，以成立獎學金及專業訓練課程。作為校友嘅自由黨立法會議員方剛、醫生佘達明、張志遠及鄧偉德等都力撐，方剛更捐出五萬元以示支持，認真有心。
方剛話，佢去年馬拉松都有落場跑吓，但就冇跑晒全馬。梗係啦，跑步並唔係佢專長，原來佢求學時期愛打籃球同游水，仲入過華仁籃球隊添。身形標準嘅方剛話，自己冇乜特別養生之道，但就對雞腳、豬皮等肥膩食品冇乜興趣，加上勤做運動，一樣keep得咁fit。
「華仁一家基金會」主要資助港九華仁書院嘅小班教學、教師培訓及學生嘅全人發展，目標係籌夠一億元，依家已經籌到九千三百萬元，能否喺明年達標，就要靠一班名人校友全力支持喇。