特首選舉委員會各分組界別候選人宣傳各出奇謀，近日網上就瘋傳社福界有個靚爆候選人，就係「民福60」嘅碧樺依（BAIG Raees Begum）喇。唔少網民封碧樺依做「選委女神」，話希望投佢一票。不過，碧樺依就呻話，靚女選選委係冇着數嘅，「得個樣、冇內涵，我都唔會投畀自己啦！」其實佢擁有博士學歷，點會冇內涵吖，佢謙虛啫。
碧樺依貌似前藝人葉蘊儀，唔少人見到碧樺依個名都好奇，其實佢係中巴混血兒，個名係佢中國籍嘅媽媽改嘅，相熟嘅人就會叫佢做「樺依」。樺依有一口流利嘅中文，原來係佢爸爸逼成嘅，佢話爸爸係巴基斯坦人，知道中文喺香港好重要，所以要樺依細細個就要學中文。
樺依現為社聯社會影響研究中心經理，佢話香港回歸後，中文愈來愈重要，但偏偏少數族裔嘅小朋友學習中文嘅機會就好少。
佢仲話，好多少數族裔人士根本唔知道有選委會選舉，唔知點樣為自己發聲，所以同班少數族裔人士爭取權益就係佢參選選委嘅最大目的，希望消滅貧窮及社會歧視，促進社會共融。