政情：張震遠點醒警察新丁
被傳會擔任疑似特首候選人梁振英（CY）競選主任嘅張震遠，尋日挺身站台，但唔係幫CY，只係以市建局主席身份出席警察結業典禮，擔任結業操嘅檢閱官。今次有一百六十幾個警察結業，張震遠就趁機點醒班警察新丁要做到「剛柔並濟」，因為現今市民嘅訴求同表達方式都趨向多元化，有啲仲會唔依常規添，所以警員要多啲耐性，判斷能力亦要敏銳啲。
張震遠話，所謂「剛柔並濟」，「剛」即係要以維護法紀同公眾安全做最高原則，仲要有絕不可退縮嘅底線，唔好畀任何人攪亂香港法規，影響法治咁話。至於「柔」就係要幫市民表達意見，皆因言論自由係香港核心價值，只要市民唔違法、唔影響他人，警員一律要全力協助咁話。簡單啲講，佢即係叫班警察新丁要識轉膊、識執生。
但佢話要做到剛柔並濟唔容易，希望班警察新丁用呢個態度服務市民，打造尊重法治同維護自由嘅社會喎。