政情：何君堯王桂壎爭選委無信心
特首選舉委員會選戰將於下月十一日舉行，多個界別嘅戰況都相當激烈，有人雄心壯志，但亦有人陣前腳軟。香港律師會現任會長何君堯及前會長王桂壎都有參選，前者出選鄉議局界別，後者循法律界出選，不過呢兩位重量級人物尋日不約而同對勝算不表樂觀，王桂壎仲話，律師會喺選委選舉嘅結果隨時影響到佢明年係咪參加立法會法律界選舉添，真係咁嚴重？
近年無論係選委定係立法會嘅法律界選舉，泛民主派參選人都有絕大優勢，好似上屆選委咁，泛民候選人就一舉取下全部二十個席位，雖然律師會都有派人參選，但就全軍盡墨。今屆法律界選委席位增加十個到三十席，一般估計，雖然公民黨面對重重打擊，但仍然可以佔絕對優勢，律師會即使可以有突破，相信只係攞到幾個位，除非有重大突發事件發生，否則應該都唔會有太大改變。
戰公民黨盼「零的突破」
雖然勝算唔高，但律師會都好積極參選，分別派出十二人及十五人兩條名單，而且平均年齡只有三十幾歲，擺明就係想實現「零的突破」啦。睇番律師會兩條名單，其中最有名嘅相信都係王桂壎，坊間一直盛傳佢明年會參選立法會法律界功能界別選舉，希望打破公民黨長年壟斷嘅局面，但佢尋日就向自己大潑冷水，話如果佢哋嘅名單攞唔到一半議席，就唔會玩立法會喎。
雖然近日公民黨處於勢弱，但王桂壎陣營嘅名單要搶到一半席位又談何容易呢？所以難怪王桂壎會咁講嘅。至於本身係屯門鄉事委員會主席嘅何君堯，就會循鄉議局界別參選，問佢對選情有冇信心時，佢就搖頭嘆息，一副不欲多談嘅樣子，莫非佢暗示勝算唔大？先旨聲明，呢個只係全屬猜測。
我哋之前講過，鄉議局界別廿八個席位，主席劉皇發當初協調由大埔、元朗及南約各分七席，即共廿一席，餘下七席就由特別議員及新界太平紳士等人瓜分。不過，協調到最後都係傾唔掂數，結果有三十人出選，換言之會有兩人落選，照計何君堯身為元朗約，理應有份做選委，但唔好忘記投票係不記名，到時咩事都有可能發生。