中環出更：高永文論盡潮州美食
為咗推廣潮食文化，身為「家己冷」嘅骨科名醫高永文尋日就到理工大學出席一個研討會，娓娓道來潮汕飲食嘅源起，儼如一位飲食達人。高醫生話，佢童年時父母炮製嘅潮州美食，至今仍印象深刻，但現時有好多地道嘅潮州美食經已漸漸失傳，就算有都失去昔日嘅味道，要再嘗當年嘅滋味真係唔容易。
難搵合心水潮州菜館
高醫生話，佢童年食嘅無米粿，依家返到潮州亦無復昔日嘅味道，而市面十分常見嘅煎蠔餅，通常都係薯粉生粉特多，蠔肉、雞蛋又特少，仲要拌酸醬嚟食，口感認真麻麻，完全唔合乎佢嘅標準。佢坦言，喺香港搵唔到一間合佢心水嘅潮州菜館，而佢經常幫襯嘅潮州菜館，亦要「指導」廚師先啱佢胃口。
基於地理關係，高醫生話潮菜之中特別多海鮮，例如門鱔本來係又腥又多骨，但都可以變成色香味俱全嘅佳餚；而學名馬蹄蟹嘅鱟，本身殼多肉少，但潮式烹調亦可將呢類甲殼生物嘅鮮美發揮得淋漓盡致。講到滷水食物，更加係潮菜中嘅經典。
高醫生不時都會同潮州商會商討，諗辦法將潮州飲食普及化，而下個月初嘅潮汕美食嘉年華，就係推廣潮州飲食嘅好機會。