中環出更：詩姐當年拜師冇咗一層樓
香港地，旺丁更旺女，女強人特別多。由菁英會女將組成嘅「菁英幗聚」，近日請來城中女強人，開壇分享成功智慧。有「法律界鐵娘子」之稱嘅基本法委員會副主任梁愛詩前日打頭陣分享，自爆當年拜師做見習律師時，食過唔少閉門羹，最後要花一層樓嘅價錢，先搵到師傅收留佢喎。
菁英幗聚論壇 分享經驗
詩姐前晚出席理工大學舉行嘅菁英幗聚「領袖之路」課程，開金口自爆身世。詩姐話，當年完成香港大學法律課程後，必須拜師實習，偏偏當年女性地位低微，女徒弟被視為「花瓶」，結果四出敲門都食檸檬，幾經辛苦先至搵到師傅收留佢。不過，當年做見習律師唔單止無人工，仲要畀錢師傅，結果花一萬元拜師。
上世紀六十年代嘅香港生活指數，一萬元已經夠買一層樓嘞，幸好詩姐家底厚，先至造就今日嘅詩姐。詩姐嘅古仔咁動聽，有份到場聽書嘅菁英會成員都拍爛手掌，菁英幗聚主席林玉茵仲讚詩姐係女中豪傑添。論壇分三日舉行，邀請政商及文化界猛人擔任嘉賓，包括前民政事務局常秘李麗娟及「最美麗港姐」朱玲玲等，認真夠分量。
卓妮