公屋垃圾蟲房署變相縱容
房署處理高空擲物問題「歎慢板」，令住戶單位「臭足兩年」！梁先生（化名）居於屯門安定邨定康樓一低層單位，兩年來上層單位住戶經常拋擲果皮湯渣，「試過晾啲衫出嚟，結果一陣就畀啲垃圾搞到又腥又臭！」梁曾多次向管理處反映，希望房署覓得「真兇」，「佢哋淨係話會掃密啲，根本治標唔治本！」早前再有一包湯渣擲下，令窗簾與床鋪皆受到污染，令梁不勝其擾。
房署發言人表示，接獲投訴後已即時清理垃圾，並張貼通告呼籲住戶注重公德，並派「偵查屋邨高空擲物特別任務隊」監視懷疑有高空擲物樓層，早前有保安員懷疑垃圾從中層一單位擲下，已向涉嫌住戶發出口頭警告後，情況已有改善。
屯門區區議員林頌鎧認為房署處理上述事件的進度太慢，不能接受，「房署成日出咗大件事先認真做嘢，其實好多小事都暗藏危機，一樣要謹慎處理！」