號稱國際都會嘅香港，空氣質素在全球五百六十六個城市中排尾八。輸畀新加坡、悉尼無話可說，連馬尼拉、巴西聖保羅及秘魯等城市都不及，你話煲呔曾呢個「氣候逃犯」同埋搞環保嘅邱騰華，係唔係雙雙要重打五十大板！
講真，邱騰華根本就唔識乜叫「環保」，一味吹水得把口為藍天打氣，上任以來，淨係動作多多，徵膠袋稅，停車熄匙，完全勞而無功，只係添煩添亂，累老朽每次去超市都要被收銀小姐追問：要唔要袋啊？老朽從不帶袋去購物，梗要啦！後面位大叔就陰陰嘴笑：咁老都咁怕死！做足安全措施喎！吹脹！
言歸正傳，政府搞咁耐環保，香港空氣質素毫無寸進，中環嘅懸浮粒子更常超標，先前有個調查話中環上班一族喺咁嘅空氣質素下謀生，分分鐘命都短幾年。有個大教授仲話，就係因為空氣太差，搞到佢有個諾貝爾經濟獎嘅朋友都唔敢來香港定居。先前老朽內心都嘀咕：有冇咁誇啊？如今睇到世衞份報告，老朽就信了。
邱騰華正一食古不化，用來監管空氣污染嘅「空氣質素指標」，二十多年未曾修改過，完全與時代脫節，老朽仲以為邱局長轉咗行搞保育添！
煲呔曾如果用人唯才而唔係用人唯親，香港就唔會亂成咁，冇瓣掂，好心佢就唔好臨收山仲出嚟亂噏無謂！正一「高談施政口懸河，藍天原來冇幾多。他日落雨趕收柴，人走茶涼奈愁何？」老朽鹹水詩一首送瘟神。