煲呔曾尋日喺禮賓府宴請全體立法會議員，相信係佢任內最後一次，點知食餐飯都出事，事後被議員鬧佢親疏有別。話說上湯嘅時候，經濟動力林健鋒（Jeffrey）見到自己同其他議員都係只分到一隻雞腳，但立法會主席曾鈺成嗰碗就有雞髀，於是佢以講笑口脗問餐飲職員點解會咁？職員見Jeffrey問得咁過癮，佢亦以詼諧方式回答話：「因為我都係姓曾囉！」
所謂見微知著，夕陽政府之中，上至煲呔曾、財爺鬍鬚曾，下至警務處處長都係姓曾，當然仲有立法會主席啦，以煲呔曾親疏有別嘅思維，分多隻雞髀畀自己友，絕對做得出呢回事，所以個餐飲職員自稱姓曾，表面上好似同聲同氣醒多隻雞髀畀曾鈺成，但暗地裏寸咗煲呔曾親疏有別都唔知。講番尋日餐飯，可能因為坐喺煲呔曾附近嘅議員都係建制派，所以無人當面提佢啲衰嘢。