兩名疑似特首候選人梁振英（CY）同唐英年，接連多日號召支持者挺身而出力撐，連早年「腳痛下台」嘅董建華（老董）都捲入其中，被惡搞會現身支持CY。話說尋日有人電郵一段「彭博」通訊社嘅新聞畀本港傳媒，預告唐唐將會冇運行，因為老董將會表態支持CY參選下屆特首，但只要細心留意下就會發現係惡搞新聞，皆因佢連老董嘅「華」字英文都串錯，而且行文亦唔似外國通訊社慣用嘅精練英文，可謂破綻百出。
CY將於明日下午兩點喺會展舊翼正式宣布參選，佢尋日出席活動後被問及係咪缺乏銀行家支持，CY強調現時係言之尚早，又話唔覺得佢嘅支持者分量畀唐唐嘅比下去，強調佢嘅班底具有真知灼見、熱誠同有承擔嘅人，自己亦會繼續努力爭取市民同選委支持。
問及老董係咪支持佢，CY就多謝老董成日關心香港同關心佢，希望日後對方會繼續喺各方面作出提點。
至於一直對參選日子三緘其口嘅唐唐，尋日繼續冇公開露面，但係就再有海洋公園主席盛智文同銀行家出面撐佢。
盛智文直言支持唐唐唔係一個容易嘅決定，佢認為未來四至五年經濟環境唔穩定，因而需要支持一個夠晒穩陣、又喺政府工作多年同公務員有好好關係嘅人，所以決定揀唐唐，唔想作出賭博喎。另有銀行家聲稱本港大部分同業都支持唐唐，又讚佢係個好領導，有願景又可面對挑戰，仲揚言唔使幫佢拉票，因為唐唐百分百會贏喎。