政情：泛民反種票 杜蟲變捉蟲

有政府中人話，要求提供住址證明單嘢非常難搞，須知依家所有年滿十八歲嘅香港永久性居民都有權登記做選民，但好多都係未出嚟做嘢嘅年輕選民，連手提電話都係用阿爸阿媽個名同地址出嘅，本身並冇住址證明；即使佢哋啲家長唔怕煩肯提供文件證實雙方嘅親子關係，亦證明唔到佢哋真係一齊住，非常麻煩同複雜；若果嚴厲推行有關建議，肯定會大大降低合資格市民登記做選民嘅比率，並滋生其他好多行政同法律問題，相信建議最後都會不了了之。

建制派持鐵票影響較小

政府唔想搞，相反被指為種票黑手嘅建制派，就對建議不表抗拒。有建制派中人分析，如果規定要提供住址證明，的確會令種票個案大減，看似會影響建制派得票，但對於佢哋班核心支持者、即俗稱嘅鐵票，就絕對難唔倒佢哋，建制派有錢又有人，大可派員幫支持者搞住址證明。反觀啲游離票同泛民支持者，向來黨性較弱，隨時因為怕煩而唔登記，最後又係益咗建制派。

查實泛民喺區選慘敗，種票可能係一個因素，對個別兩派票數吃緊嘅選區或者有啲影響，但絕對唔係決定性，大敗主因始終係泛民唔夠建制派有咁多資源做選民登記同地區工作，自己又因內訌、掟嘢及亂打官司而被中間選民唾棄。香港研究協會尋日公布嘅一項調查就顯示，有近三成喺區選中投票畀建制派嘅選民，自認係因為不滿泛民或個別候選人而投票。泛民再唔痛定思痛、對症下藥，淨係識得賴對手同政府，喺嚟緊幾場選舉都一定唔會成功！