中環出更：黃鐵城擬建玩具博物館
潮流興高科技，唔少玩具都趨精密同複雜。剛獲傑出工業家獎嘅鎮泰玩具主席黃鐵城就覺得，高科技玩具固然過癮，但係只要合乎好玩原則，低科技玩具亦同樣令人愛不釋手。不過，萬變不離其宗，佢話玩具一定要好玩至受歡迎，例如曾經風靡一時嘅扭計骰，結構簡單卻教人津津樂道，所以成功嘅玩具並無高低之分。
至於好玩嘅玩具要具備乜嘢元素，黃鐵城就認為「童真」好重要，如此才能引起小朋友嘅注目。佢話曾經睇過一套湯漢斯（Tom Hanks）主演嘅《飛進未來》電影，雖然主角擁有成年人身軀，但只有小童心智，結果喺玩具公司內步步高陞，劇情都可算係玩具業嘅寫照。
將軍澳設臨時館址
黃鐵城又話，環顧世界各大城市，好多都設有玩具博物館，可惜香港仍然付之闕如，對於以玩具業為重要出口嘅香港嚟講真係好諷刺，所以佢正籌劃一間玩具博物館，打算先喺將軍澳設立臨時館址，然後再物色長遠館址。工業總會主席鐘志平都對此建議讚不絕口，仲話喺西九文娛區設立最合適喎。