外表囂張，實質懦弱，自大同自卑往往只係一線之差。好似嗰一個臭寸黑超男咁吖，功夫茶敢寫包單，實際上係一隻冇料到嘅淆底獸。
大家會問，邊一個黑超男呀？邊一隻淆底獸呀？未入正題之前，同大家溫故知新。河北有一個官二代李啟銘，醉駕撞死人不顧而去，之後受到群眾包圍，居然口出狂言：「有本事你告去，我爸是李剛！」搬出老爹係公安局副局長嘅身份，狐假虎威企圖恃勢凌人。
好嘞，香港呢一個臭寸黑超男差不多，同樣係狐假虎威企圖恃勢凌人。事緣尖沙咀彌敦道巴士站出現違例泊車，警察抄牌嘅時候，戴上黑超、踢住拖鞋嘅車主拒絕合作，而且不停謾罵警員，十足十潑婦罵街。黑超男嘅囂張金句包括「油麻地警署署長係我世叔伯」、「中區分區指揮官佢嚟搵我、拜會我」、「你老幾？打畀你署長叫佢嚟見我」。
咁惡劣嘅態度，旁觀者當然睇唔過眼仗義執言啦，黑超男隨即向途人做出不文手勢。聽講，警員抄完牌之後，呢一位哥哥仔更加即場撕爛告票離開。
好嘞，等功夫茶同大家分析一下，如果一個人有本事，有必要認屎認屁咩？只有廢柴先至會做出咁無聊嘅動作，攀附權貴係懦夫表現。刁蠻如法官姪女Amina都唔會自吹自擂啦，千金小姐當日淨係摑咗警員一巴，並冇撻朵話自己阿叔係包致金法官。再講吖，即使油麻地警署署長真係閣下世叔伯，咁又點呢？香港始終係爛船尚有三斤釘嘅法治之區，功夫茶點都唔信芝麻綠豆官階嘅警署署長有能力隻手遮天。
今時今日莫講話差人唔係大晒，高官同樣唔係大晒。記唔記得蘇錦樑事件呀？當日呢一位未坐正嘅副局長，叫個菲傭攞住自己嘅卡片當作僱主入息證明，走去入境處申請續期居留，結果淪為醜聞主角，全港輿論口誅筆伐。即係咁，堂堂副局長撻朵都撞板，小小一個踢拖蟻民想利用警界世叔伯嚇鬼，唔好咁天真啦，自取其辱㗎咋！
諗諗下確係悲哀，社會風氣內地化，囂張港男廢柴化，以為將內地嗰一套蠻幹瞎鬧搬到香港就可以橫行霸道。喂，就算內地都未必可以目無法紀，你睇下李啟銘吖，被判踎監六年呀。至於被不肖子擺上枱嘅李剛，都要一把鼻涕一把眼淚公開道歉。
計功夫茶話齋，如果油麻地警署署長真有其人，而且又係黑超男嘅世叔伯，千祈唔好嘗試做出任何包庇行為。你知啦，警務人員知法犯法罪加一等，冇必要為一個犯眾憎嘅爛鬼世姪而自毀仕途啫，吓話！