政情：陳茂波絕橋防狼灌酒
有時因工作需要或三五知己歡聚，飲番幾杯都係等閒事，好似會計界立法會議員陳茂波（Paul）就不時需要應酬宴客，雖則有時飲酒係無可避免，但佢擔心愛女飲酒出事，所以教個女飲酒時嘅自我保護方法，其中最特別嘅一招係當畀人灌飲酒時，可以反建議對方飲一罐汽水，雖然做法有啲騎呢，但對方十次有九次都會因而飲醉喎！
阿Paul話，汽水本身有氣，加上對方之前已飲咗一定含量嘅酒精，喺汽水同酒混合下，十次有九次都會即時飲醉，但當然女仔就最好少飲為妙啦！至於阿Paul嘅酒量又如何呢？佢話要睇狀態，如果心情唔好就差啲，佢記得未做議員前，有次唔開心飲咗幾杯，醉到要人送佢返屋企。嗰次之後，自覺唔想再畀囝囝睇到自己個「貓」樣，自此就好少再飲醉酒。