政情：項明生慳皮親身代言
Sony Computer Entertainment香港分公司董事項明生（James）經常玩Cosplay（角色扮演），時不時扮成電玩遊戲主角瞓身宣傳，仲因為做得出色而榮升公司首位華人董事局成員。James日前現身浸會大學校園，溫馨提示台下一眾傳理學院學生哥，要敷多啲面膜保養好皮膚，因為將來可能要粉墨登場為未來僱主代言(o架)！
每年培養全港最多傳理系畢業生嘅浸大，邀請James去分享箇中秘訣，有學生提問，搵明星代言或搵公司高層代言有乜唔同？James好鬼馬話，最大唔同就係搵高層代言唔使畀錢嘛。不過，講真嗰句，明星通常代言好多唔同產品，唔似公司高層代言嘅形象咁專一。好似海洋公園主席盛智文，大家見到佢實諗起海洋公園喇！
好多學生問James點樣揀行業，James建議可選擇先做傳媒或公關公司，事關呢兩行有助擴闊眼界及認識自己嘅興趣。百足咁多爪嘅James興趣都唔少，最近佢參選特首選委會資訊科技界別選舉，一腳踩入政界添！