政情：任總拋四字成語挺唐
疑似特首候選人唐英年辭去政務司司長前夕，好多唐營支持者即時衝出嚟為唐唐吶喊助威，唐營喺唐唐月底宣布參選前再次重施故技，一連兩日好似唧牙膏咁搵啲財金界重量級人馬高調開腔挺唐，金融管理局前總裁任志剛尋日用三分鐘時間，用咗幾個四字成語讚唐唐，包括「知人善任」、「居安思危」、「迎難而上」等都用齊，講明對於唐唐嘅管治能力同經驗都有信心，並非有人話靠「腳頭好」喎。
不過，任總強調，自己只會喺唔影響退休生活嘅情況下為唐唐出謀獻策，表明現時唔打算做全職公職人員，變相粉碎傳聞話佢會成為下任財政司司長。我哋仲聽聞有多名社會知名人士，好似「公職王」鄭慕智、港區全國人大代表王英偉等，都係唐唐支持者。
至於將於後日宣布參選嘅梁振英（CY）嘅財金團隊又如何呢？CY話，制訂金融政策唔係靠一兩個人，又指香港過去經歷多次外圍經濟造成嘅影響，都係靠機制、金融制度及人才，相信自己亦有相當強嘅經濟金融團隊。佢又話，後日嘅記者會因場地所限，只能容納二百人，支持佢嘅市民最好留喺屋企睇電視，唔使去會展現場。
CY辭任戴德梁行董事
CY尋日正式宣布辭去戴德梁行董事職務，即時生效，至於亞太區主席嘅職務，佢相信需要一兩個月時間交接，希望明年一月可以正式退出。