政情：特手廚神炮製當奴鴨
視民望如浮雲嘅煲呔曾民望不斷插水，反映普遍市民都想盡快送走呢個瘟神，就連曾經喺煲呔曾做財政司司長時，做過佢家廚嘅于燕平都突然強勢回歸香港贈興，一手拎住鑊鏟、一手鍊住「當奴鴨」條頸，自稱「特手廚神」開班教烹飪，完全係寸爆煲呔曾。
近期政商界注意力集中喺特首選戰，大家眼尾都唔望吓夕陽政府，而一班高官嘅民望就繼續下瀉不止，其中煲呔曾被評為「表現失敗」嘅官員。就喺呢個時候，突然傳出做過煲呔曾家廚嘅于師傅，宣布由內地回歸香港大展拳腳，打算喺中環擺花街「有營廚藝」烹飪中心示範菜式，並鐵定下月七日開壇作菜，炮製煲呔曾愛吃嘅「香港特手」（秘製豬手）。
得罪權貴 被迫離港
一向敢言嘅于師傅暗寸爆煲呔曾，話自從○一年成功入稟向煲呔曾同政府追討四萬多元超時補水後，因而「得罪權貴」，連開私房菜都被一眾政府部門輪流「關注」，最終結業收場，生活由豐衣足食變成「無啖好食」，後來惟有放下鑊鏟，返到出生地上海繼承父業，成為評彈說書人。于師傅講到呢度，已流露出滿腔憤慨，對煲呔曾恨之入骨。
于師傅慨嘆話：「為咗追求公平待遇而得罪人，搞到自己無辦法喺香港生活，令佢呢幾年明白到做人真係最緊要兩樣嘢，就係健康同埋開心，如果我唔係保住健康嘅身體同樂觀嘅心情，點可以捱過呢幾年？」
為咗保持身體健康，于師傅自創冷油冷鍋煮食法，並對各種食材以至煮食用具配搭得宜，令身形肥胖嘅佢，無論血壓、血糖都正常，佢亦打算教啲現代OL煮番幾味健康餐。
至於「有營廚藝」嘅商標，由化身卡通人物嘅于師傅右手揸住隻鑊，左手鍊住一隻鴨條頸，狀似要將隻鴨落鑊煮熟。至於點解喺眾多食材中揀咗隻鴨，于師傅就笑笑口話：「你哋大家估吓吖！」今次于師傅操刀炮製當奴鴨，簡直係為普羅市民出番啖氣，大快人心。