中環出更：經濟陷嚴冬商家齊叫苦
歐美市場嘅金融海嘯餘波未了，加上租金、人工等成本升勢停不了，香港經濟面臨嚴冬嘅訊號愈來愈明顯，好多商家已撐唔住。經營茶餐廳嘅翠華集團主席李遠康話，市道又開始轉淡，公司都要步步為營，不可躁進。翠華成立至今已經四十四年，佢話公司要長遠經營下去，新舖依然要開，但會採取保守之餘不忘進取嘅策略。
不過，政府正帶頭試行男士侍產假，社會又討論緊標準工時政策，若付諸實施將令中小企業更加難捱。香港營商困難，內地設廠嘅港商日子亦都唔好過，香港錶廠商會會長蘇永強話，現時局勢仲差過三年前嘅金融海嘯，工業界已向內地反映困境，希望暫緩實施一啲影響較大嘅政策，例如暫緩實施調高最低工資十二個月等，希望幫助中小企渡過難關。
