中環出更：80後楊穎琳掌女青商會
「八十後」經常畀人話做人冇目標、態度懶散，但作為「八十後」、廿七歲嘅楊穎琳（Winnie）就一啲都唔懶散，除咗幫屋企打理家族生意外，更加入香港女青年商會接受挑戰，憑住一句「齋講唔做、永冇出路」口號，去年遠赴日本大阪參加國際性辯論比賽，仲覓得「美男」歸。來年佢將會接任做新一屆會長，成為商會成立以來最年輕嘅揸fit人。
Winnie鍾意唔同嘗試，除咗行山、跳舞，○七年喺中大工商管理系畢業後就加入咗女青年商會。Winnie話，佢係家中大女，性格好強，又因為長年玩辯論嘅關係，講嘢慣咗駁嘴駁舌，入商會接觸唔同人後，先知自己喺待人接物上好需要磨練：「有時以為件事咁做會好啲，但原來大家都唔認同，先感覺到溝通好重要。」
鍾意接受挑戰嘅Winnie去年同幾個會員去咗大阪參加辯論比賽，原來商會成立六十年以來都冇參加過國際性嘅辯論比賽，由中學已開始玩辯論嘅Winnie自然成為帶領團隊嘅核心，最後喺比賽中仲成為「最佳辯論員」，認真威水。
辯論賽識男友
不過，佢話最難忘係喺比賽中認識到男朋友Kenny，而Kenny出年亦會成為東九龍青年商會會長，到時實行兩個拍住上。
面對未來挑戰，Winnie要帶領商會走出青黃不接嘅困局，吸引多啲年輕人加入商會。佢又話，啲人成日話年輕人冇目標，所以想提供多一個平台畀年輕人，等佢哋搵到自己嘅價值。
卓妮