中環出更：舊生歡談那些年
香港大學唯一嘅女子宿舍「何東夫人紀念堂」，日前喺港大陸佑堂舉行六十周年晚宴，二百幾位舊生重遊舊地，暢談當年嘅青葱歲月。該堂歷年來孕育唔少女中豪傑，好似全國人大常委范徐麗泰、港大前副校長楊紫芝、前申訴專員戴婉瑩、建築師學會首位女會長鄺心怡等，當晚都有返母校慶祝。
爬窗返宿舍 排隊打電話
去年憑住一套《歲月神偷》揚威海外嘅導演張婉婷都係堂友，佢憶述當年宿規好嚴，女生十點前要返宿舍，仲要簽一本由職員保管嘅「點名簿」。因為職員唔識英文，佢同堂友會以「Elizabeth Taylor」等自創英文名瞞天過海，而冇門口入嘅同學，就會搵低層嘅堂友接應，爬窗返入房，驚險萬分。
現今社會人人都手揸一部智能手機，打電話快過打針，但有舊生話，當年紀念堂每層只有一部電話，用電話嘅就要排隊，上手用完會喺走廊大叫下一位，冇依家咁方便，值懷念嘅，當然仲有「何東三寶」之一嘅銅鑼（Gong）啦，昔日會敲Gong三次以提醒宿生食飯，以上種種將成為宿生嘅美好回憶。
當晚港大校長徐立之都係座上客，與學生事務長周偉立係全場僅有嘅兩位男士，佢笑言對住咁多位女士致詞，有啲緊張喎。不過，徐校長落到台下就神態自若，談笑風生，同女生影相時，仲主動教人哋點擺甫士可以影得高挑啲，深受女生歡迎。
講開又講，范太早前獲深圳市授予榮譽市民殊榮，前日正式獲頒發榮譽市民證章，真係要講聲恭喜。
卓妮