立法會新大樓好多嘢要執漏外，就連新聘請嘅保安員都未適應立法會嘅文化，所以出現早前保安員同記者衝突嘅緊張場面。立法會秘書處為紓緩呢個緊張關係，最近搵番兩位服務立法會十多年嘅老將回巢壓場。呢兩位老將做過紀律部隊，而且喺舊大樓服務多年，對於立法會嘅運作瞭如指掌，無論掟嘢、衝擊、掃枱、包圍立法會等，都能應付裕如。
唔單止咁，今次專登搵兩人回巢，亦想借助佢哋嘅經驗，培訓吓新嗰班保安員。眾所周知，立法會搬咗過去添馬艦新大樓後，保安同傳媒之間嘅摩擦多咗好多，尤其新大樓最初嘅採訪同請願安排，確實阻住記者做嘢及請願人士表達訴求，甚至發生新保安唔認得議員呢啲甩轆事件，所以秘書處無法子唔搵老將回巢救亡。
話時話，尋日新大樓為人民力量陳偉業（大舊）獻出第一次。事緣當辯論調高強積金供款最高入息水平時，大舊突然舉手示意法定人數不足，結果主席要響鐘召集議員返嚟開會，唔少返咗上辦公室嘅議員只好死死地氣走番落樓，仲要暗罵大舊累街坊添。其實係大舊即將發言，所以佢專登叫齊其他人落嚟聽嘢囉！