政情：顏明秀男仔頭聲大大
兩個月前，香港工業總會成立青年委員會，城中工業家嘅第二代漸漸喺工總活動中活躍起來。中華廠商聯合會副會長顏吳餘英囡囡顏明秀（Candy），擔任廠商會青委副主席外，亦係工總青委嘅骨幹成員。Candy話，好多企業家二代同佢一樣兩邊走，有機會可以一齊舉辦活動，加強年輕人交流。
咪睇Candy身形嬌小，其實佢講嘢聲大大，性格爽朗，原來同家族玩具生意有關。小妮子解釋話，佢自細就玩機械人、遙控車，久而久之就變咗男仔頭性格，佢笑笑口話，咁都幾好，因為人哋就算睇唔到佢，都聽到佢把聲喎。
依家工總青委有六十幾位成員，上周啱啱舉辦第一場聯誼活動，現時仍安排緊日後嘅活動及細節。Candy話，成立青委目的係要話畀後生仔聽，工業唔係夕陽行業，唔好怕入工廠工作，佢哋呢班二代平時都要喺工廠返工o架！
Candy咁熱心投入社會事務，難怪媽咪「投訴」成日喺公司見唔到佢啦！