政情：各界爭選委鬥出位
特首選舉委員會選舉已進入埋身肉搏階段，今次選委會選情之激烈，係以往不可比擬嘅，即使被質疑係小圈子選舉，但唔少參選人都絞盡腦汁宣傳自己，當正直選咁做，既搞網站、又拍宣傳片，宣傳攻勢分分鐘激烈過啲疑似特首候選人，真係唔講得笑。好似批發及零售界候選人余壽寧（Homer）及會計界候選人鄭毓和（Erik），兩個都製作咗宣傳片放上網拉票，誠意十足。
Rap政綱拍動畫
Homer係德國孖人牌代理商昌興第三代傳人，本身已經係現屆批發及零售界選委，所以今次參選係競逐連任。經驗豐富嘅佢承認今次選情好激烈，界別選民既多又難接觸，加上政綱又長又悶，要選民聽晒當然要搞搞新意思，於是諗出製作一首名為《特首選邊個，香港有得揮》嘅MV音樂片段，仲親身上陣將政綱Rap出嚟添，希望選民記住喎。
Homer笑言，唔少選民都係老闆級，個個工作忙碌，要直接將MV送到佢哋手上根本冇可能，於是將首歌放上YouTube，透過朋友以人傳人方式散播開去。佢又話，雖然自己未唱過Rap歌，但就參加過合唱團，亦有試過錄音，製作環境總算熟悉，所以花咗四個鐘就搞掂晒喇。
至於自稱獨立候選人嘅Erik，為咗有份投票選特首，特登整咗個網站，除咗個人資料、工作履歷外，仲放咗唔少個人照片上去，相信都係想選民認得佢個嘜頭啫。不過，呢啲都唔算特別，最有趣係佢同時製作咗一段名為《三色軍團》嘅動畫，除咗又係放上YouTube外，同時喺網站貼埋出嚟，確係夠晒諗頭。
呢段《三色軍團》動畫意念好簡單，片中有三位分別係兩男一女嘅疑似特首候選人，三人各率領大軍互相進攻，Erik就喺最後關頭從天而降，講出自己政綱。Erik笑言，因為仲未有人報名選特首，所以三個都係虛構角色，佢仲叮囑製作人唔好畫得太似現實中嘅疑似特首候選人添，至於大家覺得似邊個就唔關佢事喇，整條片出嚟都只係想過吓癮咁話。