中環出更：賀鐘錶雙雄娶新抱

近排擺酒嫁娶喜事多到爆，做鐘錶生意嘅工業總會副主席劉展灝（Stanley），同埋前鐘錶業總會主席梁青華，前日齊齊大排筵席娶新抱，唔少城中名人趕場趕到喘晒氣。Stanley及華哥都係首次榮升新老爺，難怪Stanley笑稱緊張過當年自己結婚，華哥就話下次會辦得好啲。咦？仲有下次？大家咪誤會，佢係講緊將來細仔結婚啫！
新郎劉燊濤（右三）娶得美人歸，幸福滿瀉。劉展灝夫婦（左二、三）同細仔Ronald（左一）笑逐顏開。右一、二為新娘父母。（溫國佳攝）
新郎劉燊濤（右三）娶得美人歸，幸福滿瀉。劉展灝夫婦（左二、三）同細仔Ronald（左一）笑逐顏開。右一、二為新娘父母。（溫國佳攝）

劉家喜宴設喺尖沙咀洲際酒店，到賀政界高官及工商界高層多到數唔晒，逼爆嘅盛況令人咋舌，當中包括保安局局長李少光、中華廠商聯合會會長黃友嘉、工業總會主席鍾志平、機場管理局行政總裁許漢忠夫婦、中策集團行政總裁柯清輝等。大家排隊同新人影相嘅盛況空前，難怪劉家要連擺兩日酒宴至招呼得晒。

除咗撐新老爺Stanley嘅賓客之外，好多本港企業家第二代亦相約去沾新郎劉燊濤喜氣，包括前工總主席孫啟烈囝囝孫榮聰及孫榮良、德國寶太子女陳嘉賢、廠商會副會長顏吳餘英囡囡顏明秀等，令現場充滿朝氣。

兩個月前娶新抱嘅前行政會議成員羅仲榮（左），同太太拍拖嚟撐劉家喜事。
  • 兩個月前娶新抱嘅前行政會議成員羅仲榮（左），同太太拍拖嚟撐劉家喜事。
工總青年委員會骨幹成員齊賀劉燊濤榮升老襯。左起：副主席陳嘉賢、主席孫榮聰、成員顏明秀及孫榮良。
  • 工總青年委員會骨幹成員齊賀劉燊濤榮升老襯。左起：副主席陳嘉賢、主席孫榮聰、成員顏明秀及孫榮良。

孫秉樞：咪搞課外活動

華哥大仔梁仲元嘅喜酒喺尖沙咀一間酒家舉行，鐘錶界猛人齊集暢飲，喜運佳鐘錶老闆蔡志明同囝囝加讚、囡囡加敏及加怡亦現身撐場。業界老行尊孫秉樞為新人獻賀詞時，告誡新郎婚後千祈咪搞「課外活動」，惹得台下賓客笑爆肚。

梁仲元（右二）做老襯，梁青華（右一）同太太（左二）飲咗新抱茶，甜到入心。左一為梁青華細仔梁仲康。（徐家浩攝）
  • 梁仲元（右二）做老襯，梁青華（右一）同太太（左二）飲咗新抱茶，甜到入心。左一為梁青華細仔梁仲康。（徐家浩攝）
蔡志明（左二）同子女撐足全場。蜜運中嘅加讚（右一）笑稱未有拉埋天窗嘅衝動。左一為加敏、右二為加怡。
  • 蔡志明（左二）同子女撐足全場。蜜運中嘅加讚（右一）笑稱未有拉埋天窗嘅衝動。左一為加敏、右二為加怡。

卓妮

「Money18免費即秒股票報價網站」現推出8升級功能，財經資訊，實時實發！