政情：李國寶開會唔識用「腦」
鮮有出席立法會會議、成日畀人話係「三點不露」嘅金融界立法會議員李國寶尋日忽然現身立法會。不過李國寶可能太少去開會喇，新大樓啲電子儀器又比舊大樓先進咗，搞到佢都唔識用。坐李國寶隔籬、花名「IQ博士」嘅商界議員黃宜弘唔抵得，起身幫李國寶開電腦，教佢點用，可見IQ博士比李國寶與時並進。
李國寶嘅花名係「三點不露」，即係無三點都唔露面，佢嘅出席率長期都係包尾。佢尋日好錯蕩，竟然去咗立法會開會。不過對住啲先進電子儀器，佢就好似冇晒符，坐喺度攤開手唔知點算。坐喺佢隔籬嘅IQ博士雖然都一把年紀，亦惟有起身幫佢開電腦，仲幫佢將枱底嘅鍵盤拉埋出嚟添，今次真係耆英教耆英。不過李國寶咁少去開會，去開會都係唔會坐得耐，其實電腦都唔使開喇，使乜學啫。