政情：網民惡搞橄欖全家福
立法會議員陳鑑林（橄欖）早排講過，會支持政府喺修訂《版權條例》時嘅建議，唔好豁免二次創作或者「惡搞」，點知佢隨即畀人惡搞，多張惡搞橄欖嘅相喺網上流傳，有一張相仲係將佢同屋企人三代同堂嘅相全部換晒佢個樣，啲移花接木技術仲唔錯添。橄欖就話，啲網民行為有針對性，簡直係防不勝防喎。
近日網上掀起一輪惡搞潮，對象就係撐政府修訂《版權條例》時唔使豁免二次創作同惡搞嘅橄欖。佢除咗張全家福畀人惡搞之外，更加有人喺網上邀請佢加入「全球改圖苦主大聯盟」，仲叫佢要反思自身，反省下自己點解畀人改咁話。
橄欖就話冇睇過啲惡搞自己嘅相，又話網民嘅行為有針對性，「搵人啲相喺度搞有咩意義﹖」又話大家唔可以話自己鍾意惡搞，就侵犯其他人嘅權利咁話喎。商務及經濟發展局局長蘇錦樑就話，今次嘅修訂係冇針對二次創作或者惡搞。所以班網民要爭取豁免嘅話，留番下次先啦。