政情：嫻姐星屑醫生齊增磅
選舉係最好嘅減肥良方，但係喺區議會選舉，出戰黃大仙選區嘅工聯會陳婉嫻同喺九龍城選嘅人民力量歐陽英傑（即係星屑醫生）一個贏一個輸，喺選完之後嘅兩星期見到佢哋，竟然都肥咗唔少。
嫻姐話，選舉時見得番好多老朋友，個人開心咗，自然會肥，不過佢點都唔肯講肥咗幾多，證明磅數同年齡一樣，永遠係女性嘅秘密。不過嫻姐話，相信好快會瘦番，因為區議會下年一月至正式復會，但依家已經跟進緊好多居民個案，有排都無得休息。
至於落敗嘅星屑醫生，日前出席人民力量集思會時，亦明顯大咗一個碼，有顯著發福。貪靚嘅醫生話唔覺自己肥咗，但當日就不停有黨友叫佢做多啲運動，變番以前咁靚仔。醫生話選舉期間的確好大壓力，每日都係食好少嘢，而選完後個人可能輕鬆番，即刻磅數急升。