政情：工專聯內訌慢火難熟
潮流興慢煮，講緊嘅係食材以低溫慢慢煮熟，唔炒唔炸，貪佢保留肉汁又夠嫩滑。由自由黨、經濟動力、專業會議及黃宜弘組成嘅工商專業聯盟，成立至今幾個月一直喺度慢煮，都唔知幾時至煮得熟，總之就未有實質嘢一齊做過。最近本來有少少起色，十二人約埋一齊見財政司司長曾俊華，就預算案畀意見，但據聞自由黨同經濟動力互相不滿對方嘅建議，諗住分開見好過，費事嘈交。
既然叫得聯盟，步伐當然要一致，本來佢哋一行十二人，打算齊齊見鬍鬚曾，以樹立工專聯嘅形象，打好頭炮。召集人林健鋒（Jeffery）仲率先講咗有兩大建議，包括寬免利得稅嘅預繳部分，等班中小企抖吓氣，多啲資金周轉，第二點就係重推中小企信貸保證計劃，就算銀行落雨收遮，中小企都唔使周圍撲水還錢。
Jeffery話明呢個係經濟動力建議，唔代表聯盟諗法，但有自由黨中人聽到呢個講法就覺得好唔妥，事前講明用工專聯名義上去見財爺，但Jeffery又周圍同人講係經濟動力嘅建議，咁即係算點喎。自由黨主席劉健儀（Miriam）承認，本來諗住一齊傾好至發表意見，但如果有人講咗先，真係唔明聯盟有乜用。講到最尾，Miriam仲嬲嬲地話，如果經濟動力咁鍾意講，咁不如分開見啦。
其實Jeffery都唔係好想一齊，因為按照慣例，每個政團見面時間都係得四十五分鐘，如果佢哋以工專聯身份見鬍鬚曾，就算十二個人到齊，都係一樣時間，唔會有多。據聞Jeffery認為咁樣搞法，每人真係講幾句就夠鐘，所以分開唔同牌頭，大家啲時間仲鬆動。
自由黨經濟動力多矛盾
佢哋不和仲有其他「劇情」，聯盟內有互相邀功嘅情況。例如區議會選舉自由黨成績理想，經濟動力嗰邊又話有幫手拉票，自由黨好唔客氣，問經濟動力攞個選民名單嚟睇睇，又例如自由黨方剛搞緊一個有關人口政策嘅辯論，經濟動力林健鋒又「出手」喺報章撰文「聲援」，好容易畀人覺得佢搶風頭。總之呢煲食材再煮唔熟，就要倒晒佢，如果唔係煮到發臭，有人食咗中毒就唔好喇。