中環出更：楊敏德着旗袍 晒修身成果
有「棉花公主」稱號嘅行政會議成員楊敏德（Marjorie）日前以香港理工大學校董會主席身份出席活動時，着咗件灰黑色絲質旗袍，外加一件黑色外套，莊重又飄逸，不愧係品味超凡嘅紡織界女王。
以前Marjorie公開亮相時，不時演繹愛女潘楚穎設計嘅潮流時裝，時代女性嘅形象好鮮明，甚少見佢打扮得咁古典。Marjorie笑稱，佢以前經常着旗袍，但係後來肥咗着唔落啲長衫，先至少咗着。近排佢積極節食keep fit，清減咗唔少，於是搵相熟嘅裁縫度身定造呢件旗袍。卓妮見佢節食後嘅修身成果咁好，努力總算冇白費。
設計保留傳統韻味
Marjorie係上海人，又係紡織業叱咤風雲嘅女強人，對衣着自然有份特別嘅執着。佢話，件旗袍嘅設計係「傳統到冇得再傳統」，由佢媽媽嘅年代就着到依家，佢冇喺設計上做改動。Marjorie一向力撐本地設計，原來一樣咁支持保留中國傳統服飾嘅設計韻味。