中環出更：新總部飯堂早晚客量懸殊
一直被批評大而無當嘅添馬艦新政府總部，尋日首次開放畀傳媒參觀，政府總部有過千人返工，估唔到飯堂竟然細到令人大跌眼鏡，只有過百個座位，根本唔夠用。尋日中午食晏時間，大批公務員逼爆現場，要攞飯就大排長龍。不過呢個飯堂有獨特嘅難處，就係樓上獨沽一味寫字樓，無其他商業活動，所以午飯時間過後，就水盡鵝飛。
食物質素OK 價錢適中
好彩呢度嘅食物質素OK，至少好過舊中環政府總部飯堂多多聲。餐廳提供中西食物，有焗飯、扒飯同埋碟頭飯等，下午茶時段又有即叫即做三文治。價錢方面都算適中，以午市雞扒飯為例，唔包嘢飲每客盛惠廿六蚊。不過，有人就覺得分量唔多夠。
此外，首次開放嘅記者室位置經過精心設計，遠離東、西翼大堂，如果有官員喺西翼大堂出現，記者飛奔去到門口至少要推四道門，擺明係阻住記者採訪喇！