政情：消防新一哥 銳意改陋習？
消防處前處長盧振雄退位之前連串「退休騷」，畀前線人員怒插浪費公帑、又要班細嘅做「泊車仔」公器私用，話口未完消防又畀人篤，我哋日前收到「鬼信」，話消防前晚喺沙田馬場會所，為新任處長陳楚鑫舉行迎新盛宴。
退休處長盧振雄早兩個月先至畀人射到成背脊都係箭，新官上任嘅鑫Sir唔通仲唔醒水，不惜成為另一箭靶？消防處發言人前晚透過政府新聞處否認其事，話今次呢個歡迎晚宴，每逢有新處長上任都會搞，出席嘅都係自己人，當中只有少量係其他嘉賓，仲話晚宴係同事間夾錢搞，並無用到公帑咁話。
口講無憑，記者前晚深入虎穴直擊晚宴實況，二、三百個出席消防屬員個個身穿白色消防禮服到場，非常隆重。但當晚的確再冇見到有前線人員畀人老點去泊車同做接待工作。似乎新官上場後，新人事新作風，莫非鑫Sir銳意改走晒部門昔日嘅陋習？