政情：雙英各自現身 同被柴台
提早宣布參選嘅「雙英」尋日繼續落區，更慘遭人柴台。唐英年踩足兩場，早上先去天水圍見居民，下午就到融樂會同啲少數族裔傾偈。唐唐紆尊降貴到天水圍見街坊，但街坊唔領情，直指唐唐為咗挽回民望先至落區，只係做表面工夫。有街坊呈上有卅萬名居民簽名嘅大支票畀唐唐，要佢白紙黑字簽名承諾容許地區小販市集、興建街市等五大訴求，可惜唐唐話張支票涉及選舉條例，所以唔肯簽。
謝永齡質詢CY「迫遷」
至於做過城大校董會主席嘅梁振英（CY），尋日就返城大出席教協主辦嘅教育論壇。本來返娘家威威，但被城大教職員協會會長謝永齡質詢，問佢點解早前要迫遷協會？論壇亦有人問，若CY做特首，會搵邊個做教育局局長。CY笑笑口話，佢只係做校董會主席，唔係管理層，房間問題唔係佢嘅工作。至於邊個做教育局局長，CY就將個波推番畀與會者。
