政情：煲呔曾想訪台添煩添亂

眾所周知煲呔曾對台灣有一份特別嘅情意結，事關四十二年前佢結婚時，就係到台灣度蜜月。七十年代佢喺亞洲開發銀行做嘢，最後一次到過台灣，自此就未曾再踏足寶島一步。加上回歸後由於兩岸關係一度好差，從未有現任特首可以訪台，如果煲呔曾可以喺明年六月三十日落台前成行，無論訪問結果係點都好，都肯定可以名留青史。

依家先去 擺明風花雪月

最近我哋收到可靠消息，話煲呔曾訪台嘅大計已進入安排具體行程嘅階段。台灣行政院院長吳敦義，亦已批示行政院大陸工作委員會規劃有關細節。由於煲呔曾嘅夕陽政府只剩下七個幾月時間，依家先至去訪問，擺明只談風花雪月，唔會掂到同兩地民眾利益攸關嘅實事喇！所以今次訪台最關鍵嘅並非見乜嘢人、去乜嘢地方同傾乜嘢議題，而係邊個時間訪台「安全系數」最高。

須知依家台灣選戰正酣，香港特首由小圈子選舉產生兼由北京操控，經常成為台灣民進黨攻擊國民黨候選人嘅政治彈藥，加上煲呔曾政治超低班，去到政治高手雲集嘅台灣實被人玩殘，相信喺明年一月十四日投票之前，中央一定唔會批准煲呔曾訪台。就算佢唔知醜任人玩，台灣國民黨政府都唔想招呼佢。

接住明年二月香港有預算案要搞、三月又有北京召開全國人大及政協會議同香港嘅特首選舉，全部都唔係訪台嘅好時機。最重要係一旦民進黨重新上台，當地政治氣氛同兩岸關係都會全然改寫，煲呔曾隨時呢世都冇得去。不過，由於台灣現屆政府會去到明年五月廿日先至正式卸任，扣埋約一個月嘅政權交接期，估計四月份成行就最少機會出事，唯一唔好係可能會成日落雨，影響煲呔曾借公費去旅遊觀光嘅大計。