中環出更：啟剛晶晶拍拖撐體操
霍英東長孫霍啟剛同「跳水公主」郭晶晶拍拖已逾七年，雖然間唔中傳出佢哋情海翻波嘅消息，但係「七年之癢」並冇發生喺佢哋身上，而中港十幾億人好想知佢哋幾時拉埋天窗。尋日下午啟剛同晶晶突然拍拖現身馬鞍山體育館，齊撐首次於香港舉行嘅國家級體操賽事，引起現場觀眾一陣騷動，大家見到晶晶呢位國寶級運動員都感到興奮。
晶晶習慣退役生活
尋日賽事係國家體育總局體操運動管理中心主辦，香港體操總會承辦，啟剛身為香港體操總會會長，梗要現身撐場啦，估唔到仲帶埋女友出席，畀大家一個驚喜。卓妮見佢哋觀賽時好認真，啟剛上台頒獎時，晶晶就企埋一邊，兩人默契十足。
影完大合照後，卓妮見兩人準備離去，問啟剛係咪同女友拍拖去玩，啟剛一聽到問題就笑住話：「問題變晒質嘅！」唔肯回答。卓妮就轉頭問晶晶覺得退役生活如何，佢話都好習慣，最大轉變係心情唔同咗，事關以前比賽時自己係主角，依家就變咗觀眾，睇得好開心。
呢場「恒基兆業盃2011年全國體操冠軍賽」，號稱係香港體壇歷史性嘅盛事，國家隊名將陳一冰、肖欽等人，今日將出席決賽嘉年華，為運動員打氣，相信啟剛會繼續去撐場，但會否再見到晶晶，就要睇大家彩數喇！
卓妮