民望持續偏低嘅政務司司長林瑞麟（林D9），尋日首次出席社聯活動，大會安排咗林D9同近二百個會員分享福利政策心得，而且演說內容係大讚社聯嘅。為咗隆重其事，社聯快快手準時喺搭正四點鐘開完大會，連社聯執行委員會主席廖達賢都話：「今次time management（時間管理）真係好喇！」
點知好衰唔衰，林D9管理唔好時間，搞到遲到。可能林D9都知衰遲到唔着，一上台致辭就即刻喺度冧班社聯會員，大聲朗讀：「你哋，已經成為咗香港非常重要嘅元素！」之後仲好骨痹咁大讚社聯話，雖然政府未必樣樣都可以做到，但前線社工每日都喺度為香港把脈，可以提供到一啲政府提供唔到嘅服務，仲話既然大家都係政府嘅夥伴，鼓勵大家繼續無私奉獻喎。