政情：理大啟動75周年慶典
創校以來培育咗逾三十萬名人才嘅香港理工大學，明年將邁進七十五周年校慶，尋日特登喺校園舉行盛大啟動儀式，為長達一年嘅連串派對揭開序幕。
啱啱上任嘅大學教育資助委員會主席鄭維新首次現身，教統會主席鄭慕智亦有撐場。理大係工業人才搖籃，工業界翹楚梗要去打氣啦，包括工總前主席孫啟烈及現任主席鍾志平、工程師學會前會長梁廣灝、玩具界女強人顏吳餘英等。咁多嘉賓畀面，難怪理大校董會主席楊敏德及校長唐偉章愈忙愈開心。
咁開心嘅時刻，理大自資成立嘅教學研究酒店Hotel ICON，精心炮製一款特色糕點加料慶祝，即日起喺酒店供應。楊敏德攞住蛋糕影相時，對蛋糕上面嘅七十五周年字樣好敏感，笑稱會被人以為佢七十五歲喎，真係識講笑。
值得一提嘅係，尋日有位首屆畢業生現身，佢就係九十高齡嘅伍永康。大家可能只知理大有一座以佢命名嘅大樓，但原來近年人氣極旺嘅反斗發明家兼牙醫伍士銓，正係佢嘅囝囝，難怪大家拍爛手掌歡迎佢喇。