職工盟立法會議員李卓人喺區議會選舉輸咗畀有工聯會小花之稱嘅劉桂容，唔知係咪唔忿氣又無處發洩，尋日出席香港大學一個講外傭居港權嘅學生論壇時擺工聯會上枱，話不屑佢哋踩住外傭煽動排外情緒，又話政府對外傭居港權事件唔聲唔聲，係為咗喺區議會選舉幫建制派咁話。原來除咗公民黨，連阿人都係姓賴嘅。
阿人喺區會選舉輸畀劉桂容，有氣無碇呻嘅佢惟有對住班學生發牢騷，話之前睇到一篇文章寫到有個洗廁所工人同人講，因為工聯會反對外傭有居港權覺得好溫暖。佢睇到就覺得好心酸，因為香港嘅工人好冇安全感，又話作為工會唔應該搵啲最冇聲出嘅外傭去恰喎。
阿人繼續向工聯會開火，話之前傾外傭加薪五百蚊，工聯會就話中產大鑊喇。佢就質疑︰「中產會緊張嗰五百蚊咩﹖」連舊帳都摷番出嚟講，仲要話政府對外傭事件唔肯出聲，係為咗喺區議會選舉幫建制派咁話。