政情：徐立之預告留港做研究
香港大學校長徐立之早前宣布唔再續任，大家都好關心佢之後嘅去向。徐校長早前出席一個活動時話，佢明年八月底任期滿，之後仲有年半任期，離任後做啲乜，到時先再講喎。徐校長本身係加拿大好有權威嘅分子遺傳學家，佢唔否認退任之後會繼續研究遺傳學，到時會穿梭加港兩地，但主要都會留番喺香港做研究。
國務院副總理李克強訪港期間訪問港大，發生警方接管港大風波，之後徐立之宣布唔再續約，不過原來佢都係心繫香港。梗係喇，佢係香港人，香港始終係佢屋企。
講到近期iPhone 4S大熱，手持iPhone 4嘅徐校長話唔會換新機住。佢話自己本來用緊iPhone 3，前排同老友打乒乓波嘅時候唔小心坐爛咗，為咗隨時上網搵資料方便工作，惟有出新機。
佢話自己以前都仲會追吓潮流嘅，依家唔會喇。