政情：張佐華彈新立會冇韻味

六大慈善機構東華三院、保良局、樂善堂、博愛醫院、仁濟醫院以及仁愛堂共過百位董事局成員，尋日晏晝去咗參觀新大樓。

東華三院副主席施榮恒隱晦地彈新大樓嘥地方，佢話新大樓地方咁大，仲有空間優化，而東華三院總理張德熙就好幽默，佢話畀學生喺教育活動室開吓模擬會議係好事，不過學生們唔好學議員掟嘢就得嘞。仁濟醫院主席李文斌則對會議廳前廳嘅銅鑼充滿興趣，好想親自去敲響銅鑼，不過導賞員話，一敲響咗可能會召晒啲議員嚟開會，搞到李文斌只能細細力咁敲。

新大樓大而無當嘅批評言猶在耳，但立法會秘書長吳文華尋日透露，如果將來立法會議席加到七十席以上，新大樓都係唔夠地方用要擴建，只不過要等到真係增加議席，先至可以問政府攞資源。