政情：劣勢唐唐怒炒PR
兩位疑似特首候選人前政務司司長唐英年同前行政會議召集人梁振英（CY）前日至首次正面交鋒，尋日就傳嚟勁爆消息：唐唐忽然怒炒公關大員關鄭麗敏（Heidi）魷魚，堂而皇之嘅理由係Heidi兩個月合約已完。不過兩陣對壘，有人陣前易將肯定事有蹊蹺，江湖上流傳兩個原因，其一係Heidi失職，因為唐唐嘅民望同形象愈做愈沉，另一原因係Heidi嘅亞聯政經顧問根本有其他生意做緊，而選特首根本係一個龐大工程，全職去做都未必做得好，何況非全職。
唐唐離開政府個半月來，醜聞、緋聞不絕，擺脫政府嘅包袱之後，都唔見得佢有一個嶄新嘅形象出現，佢所提出嘅政策，亦唔見得有平地一聲雷嘅效果，不過如果計算呢個半月嚟最失誤嘅事件，就有「床照事件」同「港專事件」。
論壇齋噏 高下立見
早前唐唐落荃灣探訪套房居民，堂堂大男人筆直地攤喺人家張床上影相，立即被網民瘋傳為唐唐「床照」，惡毒啲嘅網民仲將唐唐放入棺材，咒佢「英年早逝」，認真大吉利是。到前日唐、梁初次喺CY做校董嘅香港專業進修學院碰頭，埋身肉搏前，CY不經意地問唐唐有冇去過港專，唐唐坦言冇，仲反問CY有冇去過，點知CY得意地回應「呢度我搞嘅」。之後兩人大談房屋問題，有備而嚟嘅CY圖文並茂，用投影片詳解構思，唐唐則只靠一把口齋噏到尾，CY先勝一仗，高下立見，初時唐唐仲賴港專冇提出有投影設施可用，搞到港專不得不澄清，其實有問過雙方，只有一方話會用投影設施。
種種甩轆導致唐唐形象一敗塗地，由佢嘅民望被CY超前可見一斑，照咁睇佢怒炒Heidi不無道理。Heidi身為前政務司司長「肥龍」許仕仁愛將，由佢坐陣嘅亞聯，老早接咗唔少政府項目嚟做，雖然佢哋○八年喺未經招標下，獨得為政府推銷醫療融資政策報告嘅合約，惹嚟明益自己友之嫌後，少咗政府合約做，但仍然有唔少生意喺手，根本難以專心服侍唐唐一人。
亦有唐營中人分析，原來Heidi要拍住其前老闆許仕仁，至有神奇效果，Heidi獨擔大旗，表現就未見出色。據聞接手嘅，會係最初唐唐被指用公帑搞選舉時出現過嘅名字、前立法會秘書長馮載祥太太、傷殘人士體育協會主席馬潔嫻。
觀乎唐唐民望江河日下嘅形勢，今次藉機送舊迎新，至於換公關係咪有用，大家不妨拭目以待。
CY尋晚出席一個活動，被問及唐唐換公關，係咪先贏一仗，佢笑不攏嘴咁話，唔會用贏同輸嚟睇呢個問題，為佢做公關嘅人，都係本住同一理念同熱誠去做嘅，都係本住為社會服務嘅心。