政壇近排興開期票，煲呔曾施政報告開咗一大堆，兩個疑似特首候選人亦開埋一份，連新官上任嘅政務司司長林瑞麟都唔執輸。
話說林瑞麟日前向立法會匯報關愛基金扶貧進度，聲稱已經推出十幾項計劃同服務，受惠市民未來幾年會超過三十萬咁話。聽落就幾吸引喇，問題係錢從何而來？佢話喎，商界籌款已經有十八億元，如果資助項目做出成績，商界會繼續「關心」呢個基金。
林公公都算蠱惑咯，淨係講認捐嘅數目有幾多，隻字不提已經到手嘅錢有幾多。其實，佢唔係一時疏忽講漏咗，而係條數實在太肉酸，唔好意思講出口。嗱，關愛基金年初設立以來，話就話商界認捐十八億，但實收金額可能只有十億八億，離政府同商界各出五十億元嘅籌款目標差咗一大橛，咪惟有玩數字遊戲氹商界繼續落疊咯。
講真，市民早就懷疑關愛基金唔撐得幾耐，除咗「錢途」問題，扶貧項目唔湯唔水，不倫不類，所謂為綜援網以外「漏網之魚」提供協助，居然淪為專門幫港府施政失誤執手尾嘅「萬金油」基金，令人啼笑皆非。
冇錯，關愛基金資助名目繁多，五花八門，有啲直頭諗都諗唔到，可惜資源有限，唔可能好似黃大仙咁有求必應。其實，善長仁翁最關心嘅問題係錢係咪用得其所，如果真係幫到有需要嘅人，捐款自然會源源不絕。
弊在港府一開始就有私心，將扶貧責任同民間慈善功能大兜亂，美其名曰官商合作，查實係玩政治化妝，將關愛基金變成幫煲呔曾卸膊嘅「關人基金」。基金概念模糊不清，資助項目唔分輕重緩急，未能幫助Ｎ無人士嘅批評一直不絕於耳。
好似資助清貧學生遊學咁，冇錯係一項德政，但相對於貧困家庭子女開學買新課本、添置校服，又或者幫低收入家庭對抗通脹，資助遊學好明顯係輕重不分，九唔搭八。
港府派六千蚊派到怨聲載道、醫管局藥物名冊搞到病人「冇錢冇藥醫」、甚至長者冇錢鑲牙等等，統統搵萬金油「關愛」，咁搞法，商界有乜辦法唔望而卻步吖。講開又講，關愛基金向低收入新移民派發六千蚊，已收到九萬份申請，首批津貼已經派出，但不可不知，合資格新移民接近二十四萬，淨係呢條數就要十四億，關愛基金好快乾塘嘅咋。
計功夫茶話齋，當局一日唔清晰界定關愛基金扶貧目標，繼續渾水摸魚將基金用嚟執漏補鑊，商界一日都唔會積極認捐，唔係人哋孤寒，而係夕陽政府實在太混帳！