《大戴禮記》：「食肉勇敢而悍，食穀智慧而巧。」然則，吃曱甴呢？唔使問阿桂，梗係令你嘔足一百分！
睇見大家樂嘅「小強菜式」，嘩！當堂醒一醒，曱甴米粉、曱甴雞扒早餐、曱甴伴木瓜花生湯、火鍋醬料之曱甴掙扎求存……醒完之後——跟住一地都係白泡、黃膽汁。
老朽一介草民，經常光顧快餐店，如今諗起，胃口全消。講真，睇見咁多小強，如果你仲有胃口，相信你一定係個樂天知命的逍遙客；而你如果經常光顧此類連鎖快餐店，食足一年都冇乜事，恭喜閣下，你身體應該幾好，或者腸胃都唔錯。
食肆有衞生問題，報章的投訴版常見到，之不過，好似大家樂咁，曱甴無處不在，生嘅有，死嘅有，如此「加料」，難免令人質疑，究竟年賺幾億元嘅連鎖快餐店，有冇為顧客嘅健康設想？仲斗膽話做足一百分，我呸！十分都畀多啦！
老朽好懷念昔日嘅街邊大牌檔，或舊居樓下嘅小店，可惜，依家都被趕絕，無計，租貴。美味情緣，只能夢中尋。美好的食物總是真情流露，適合大眾的口味，沒有矯飾，不必標榜甚麼做足幾多分，總之，老老實實的煎炒炆炸，有時溫柔，有時狂野，總渲染着青春活力，帶着地方特色與親切。俱往矣！
為了不想老來上演「那些年，我們一起嘗過的曱甴」，老朽下定決心回歸廚房，自己煎蛋煮早餐，晚上茹素，說不定變成終生吃蔬菜，數學一流嘅畢達哥拉斯。